المحاكمة ( قصة طويلة في حلقات )

واحد بيحب مصر 26/12/07, 12:51 pm

جرس الهاتف ذلك الشىء المزعج ، تمنيت في هذه اللحظة لو أن السيد جرهام بل لم يخترع جهاز التليفون ، في كسل خرجت يدي من تحت البطانية ، كان رئيس التحرير على الطرف الأخر ( أنت لسه نايم يا أفندي .. المحاكمة فاضل عليها نص ساعة .. فز قوم ) ،إنتهيت من حمامي في عشر دقائق وهذا معجزة ، خرجت إلى الشارع ، الصباح الباكر ، لم يبدأ مارثون الحياة بعد ، توجهت إلى محطة المترو في أخر الشارع ، صعدت كوبري المشاه إلى الرصيف الأخر ، إتجاه حلوان . من بوابة الخروج في محطة أحمد عرابي إلى شارع رمسيس ، تحركت في إتجاه محكمة النقض ، عبرت باب المحكمة إلى الجانب الأخر حيث دار القضاء العالي ثم توجهت إلى قاعة المستشار عبدالرازق السنهوري حيث تجري وقائع تلك المحاكمة ، توقعت أن أجد القاعة وقد إكتظت عن أخرها بالبشر ، صحفيون ومراسلون وجمهور ولكن لا يوجد أحد ، أنا فقط . نظرت إلى الساعة أعلى منصة القضاء ، الوقت صحيح ، تحدثت إلى نفسي بالصبر ، تأملت قفص الإتهام ، خيل لي أن مساحة القفص لن تستوعب عدد المتهمين في محاكمة اليوم ، دخل حاجب المحكمة من باب خلف منصة القضاء وفي نفس الوقت دخل إلى القاعة شاب في مقتبل العمر ، تدل ملابسه أنه عسكري في الجيش ، جلس الشاب في الصف الأول ونطق الحاجب ( - محكمة ) . دخلت هيئة المحكمة من الباب خلف منصة القضاء ، كانوا ثلاثة ، المستشار مصطفى كامل رئيس المحكمة و المستشار سعد زغلول عضو يمين والمستشار محمد فريد عضو يسار، تحدث المستشار مصطفى كامل ( - صاحب الإدعاء يتفضل ) نهض الشاب في الصف الأول وقبل أن يتحدث إنتفضت واقفا (- ياريس ) من خلف نظارته نظر إلي المستشار مصطفى كامل ( - خير يابني ) ( - فيه حاجة سيادتك نسيتها ياريس ) (- حاجة ؟! حاجة إيه ؟ ) (- النيابة .. فين النيابة ؟ ) ( النيابة أجازة النهارده الجمعة .. وإقعد بقى عايزين نشوف شغلنا .. الإدعاء .. إسمك وتاريخ الميلاد والوظيفة والعنوان ) تحدث الشاب ، كان صوته كأنه يأتي من أعماق بئر في الصحراء ( - أحمد عبدالله المصري .. مواليد 23 /7 / 1952 .. الوظيفة الحالية شهيد .. والعنوان الجنة ) ( إنتهت الحلقة الأولى )

جويرية 26/12/07, 12:53 pm

بداية جميلة واحنا فى انتظار باقى الحلقات

atefazt 26/12/07, 01:05 pm

الله الله البداية جميله وهنكمل للاخر
يارب مولد اديب كبير

أبو الفداء 28/12/07, 10:04 pm

أهلا...أهلا...بمن سيحي المنتدى من جديد...

بداية جميلة ومشوقة جدا...

والفكرة شكلها حلوة...

أنا خايف لتعلقني زي ما كنت أنا بعلق الناس إيام "الديسلام هو الحل" ...

هو اللي بنعمله في الناس هيطلع فينا وللا إيه...

في انتظار الجزء القادم..
________________

مش عارف ليه القصة ذكرتني بالأغنية الجديدة اللي عمالين نسمعها ليل نهار في العربيات الأجرة ...
اللي اسمها المحكمة بتاعة المغني"سيد الشيخ"...

هههههههههههههههههه

أشرف عبد الجليل 29/12/07, 09:39 pm

اكمل وبعد ذلك سوف نرى أننقد ام نكن من المصفقين

محمود عبد الوارث القاضى 31/12/07, 09:05 am

قصه جميله ان فى انتظار باقى الحلقات

ERAGON 31/12/07, 02:13 pm

قصة جميلة ومشوقة واحنا فى انتظار الحلقات الباقية لكى تكتمل الصورة

واحد بيحب مصر 01/01/08, 04:28 pm

كانت كلمات الشاب صاحب الرداء العسكري تنعكس على وجهي كلمة كلمة ، أحمد عبدالله المصري .. شهيد .. الجنة ، من خلف نظارته لمح المستشار مصطفى كامل رئيس المحكمة الدهشة والإستغراب على وجهي لذلك نظر إلي وقال ( - ليه الدهشة والإستغراب .. أنت نسيت كلام ربنا سبحانه وتعالى .. ولا تحسبن الذين قتلوا في سبيل الله أمواتا بل أحياء عند ربهم يرزقون ) ، إلتفت المستشار مصطفى إلى الشاب وقال ( - إتفضل .. قول شكوتك ) ، تحدث الشاب ( - ياريس بعد إذن المحكمة .. أنا بطالب بوضع المتهم في القفص ) ، ( - ومين المتهم ؟ ) ، ( - الشعب .. الشعب المصري ) خرجت الكلمات الأخيرة من فم الشاب ليهبط الوجوم على جميع من في القاعة ، أول من تحدث كان رئيس المحكمة ( - أنت سايب الجنة والنعيم وجاي تتريق علينا .. أه مانت مابتركبش مواصلات ولا بتستنى مرتب في أخر الشهر ) ، ( - ياريس مافيش شهيد يتريق على حد .. أنا شهيد ياريس ) ، ( - طيب يا شهيد .. تقدر تقولي أحطلك الشعب المصري في القفص إزاي ؟ .. قولي يا شهيد ) ، ( - أنا أقولك يا ريس ) إلتفت المستشار مصطفى إلي بعد أن خرجت تلك الكلمات من فمي وقال ( - أنت ؟! .. أنت مين اللي قالك تتكلم ؟ ) ، ( ياريس أنا عايز أساعد مش أكتر ) ، مال المستشار مصطفى على المستشار سعد زغلول عضو اليمين ثم فعل نفس الشيء مع المستشار محمد فريد عضو اليسار ثم قال ( - إتفضل .. قول ياسيدي .. لما نشوف أخرتها معاكوا أنتوا الاتنين ) ، بشيء من الفخر تحدثت ( - ممكن الحاجب بعد إذن المحكمة طبعا يخرج يتمشى في الشارع ويختار خمسة .. أي خمسة يقابلهم في الشارع .. ويبقوا دول ممثلين عن الشعب المصري .. ونجبهم نحطهم في القفص ) ، عاد المستشار مصطفى رئيس المحكمة إلى عضو اليمين وإلى عضو اليسار وقال ( - المحكمة موافقة .. بس يجيب أربعة بس .. الخامس موجود ) ( إنتهت الحلقة الثانية )

عبدالرحمن 01/01/08, 10:02 pm

شكرا واحد بيحب
مصر

احمد عبد الهادي 02/01/08, 10:14 am

رائعة فعلا
بشوق كبير منتظر باقي القصة
انت فعلا اديب كبير يا باشمهندس

واحد بيحب مصر 02/01/08, 06:56 pm

والله أنا فرحان إنك رجعت للمنتدى تاني يا أستاذ أحمد

المدير 02/01/08, 07:29 pm

واحنا كلنا فخورين بكتاباتك يبشمهندس

محمد هنائى 02/01/08, 09:11 pm

قصة رائعة جدا ياهندسه ونحن فى انتظار باقى الحلقات

egyptian zoro 05/01/08, 01:26 am

انا منتظر باقى الاجزاء حتى نستمتع بكتاباتك الشيقة

شكرا لك / واحد بيحب مصر
الى الامام دائما

أبو الفداء 05/01/08, 08:31 am

هل سننتظر كثير!!؟؟

جويرية 05/01/08, 11:45 am

قصة جميلة قوى

واحنا فى انتظار باقى الحلقات

احمد عبد الهادي 05/01/08, 12:26 pm

أبو الفداء كتب:هل سننتظر كثير!!؟؟

واحد بيحب مصر 06/01/08, 07:08 pm

تحرك الطابور إلى داخل القاعة ، الحاجب في المقدمة ثم الأربعة ، دخل الأربعة القفص دون إبداء أي معارضة ، تعجبت ولكن الشاب صاحب الرداء العسكري ( الشهيد أحمد عبدالله المصري ) لم يترك لي فرصة للتعجب ، قال ( - ياريس دول أربعة بس .. فين الخامس ؟ ) ، أشار المستشار مصطفى رئيس المحكمة إلى القاعة وقال ( - الخامس أهوه ) ، تلفت حولي فلم أجد غيري في القاعة ( - أنا ياريس ؟!! ) ، ( - أيوه أنت .. أنت مش من الشعب المصري وإلا إيه ؟ .. حطوه في القفص ) .داخل القفص كان ترتيبي الخامس ، نظر إلينا المستشار مصطفى وقال ( - كل واحد يقول وظيفته .. الأسم مش مهم ) ، تحدثنا بالترتيب ( - عاطل .. - عاطل .. - عاطل .. - عاطل .. - صحفي ) ، نظر المستشار مصطفى إلى الحاجب ( - مالقتش إلا دول .. كلهم عاطلين ) ، ( - دول اللي في الشوارع يا ريس ) ، ( - مش مشكلة .. أهم برده من الشعب ) . نظر المستشار مصطفى إلى الشهيد أحمد المصري وقال ( - الشعب ودخل القفص ..إتفضل يا شهيد قول المشكلة ) ، تحدث الشهيد ( - ياريس بإختصار .. أنا أشهر عسكري في تاريخ العسكرية كلها .. حاكم أنا أول عسكري يرفع علم مصر على أرض سينا يوم 6 أكتوبر سنة 73 .. وأنا على الصفة الغربية قبل العبور ماكنتش خايف من الموت .. كنت بقول إيه يعني نموت بس بلدنا تعيش .. وتعيش .. وتبقى أعظم بلد في الدنيا .. دخل جسمي 1054 رصاصة .. ومن يوميها .. يوم 6 أكتوبر 1973 وأنا شهيد .. من يوميها لحد النهارده 6 يناير 2008 وأنا مستني .. كل يوم أقول يمكن بكره ويجي بكره وأقول يمكن بعده ويجي بعده وبعده وبعده .. وأنا برده مستني ) ، المستشار مصطفى ( - مستني إيه ؟ ) ، الشهيد ( مستني مصر تبقى أعظم بلد في الدنيا ) ( إنتهت الحلقة الثالثة )

محمد عماد بيومي حسن 07/01/08, 12:42 pm

امممممممممممممممم احنا في انتظار باقي هذه القصه الجميله ياباشمهندس

شهد احمد 08/01/08, 05:59 pm

بجد جميلة جميلة وهاموت واقرأ باقى الحلقات ياريت تنزلها بسرعة من فضلك برافو عليك شطووور

واحد بيحب مصر 10/01/08, 05:33 pm

همس المستشار سعد زغلول عضو اليمين في أذن المستشار مصطفى كامل رئيس المحكمة الذي بدوره إلتفت إلينا وقال ( - إتفضلوا .. دافعوا عن نفسكم .. الأستاذ أحمد عبدالله المصري .. الشهيد .. بيسأل .. مصر ليه مش أعظم بلد في الدنيا ؟ ) ، تبادلنا النظرات ، أنا والأربعة ، تحدث أول عاطل ( - ياريس وإحنا مالنا .. مصر أعظم بلد .. مصر مش أعظم بلد .. إحنا مالنا ومال الكلام ده .. أنا عايز أرووح ) ، إنفعل المستشار مصطفى كامل ( - ترووح؟!! .. يا أقندي أنت وافقت تدخل القفص وتتكلم بسم الشعب المصري .. يبقى تجاوب على السؤال الموجه إليكم وبس ) ، أشار العاطل الثاني إلى الحاجب وقال ( - الراجل ده ضحك علينا .. قالنا فيه شغل هنا ) ، العاطل الثالث ( - أيوه الراجل ده ضحك علينا ) ، تناوب المستشارون الثلاث نظرات الغضب إلى الحاجب ، المستشار مصطفى ( - والعمل دلوقتي ؟ ) ، تحدثت على مضض ( - ياريس أنا عندي حل بس يارب يعجب هيئة المحكمة .. مسابقة .. نعمل مسابقة .. ونشوف مين هيقدر يجاوب على شهيد حرب أكتوبر اللي دخل جسمه 1054 رصاصة .. مين اللي يقدر يقولنا مصر ليه مش أعظم بلد في الدنيا ؟ )
، نهض الشهيد ( - ياريس أنا موافق على موضوع المسابقة .. بس بعد إذن المحكمة أنا مضطر أرجع الجنة على ماتلاقوا الأجابة ) ، تشاور المستشار مصطفى مع المستشار سعد زغلول ثم مع المستشار محمد فريد ثم قال ( - يتم إحالة السؤال الموجه من السيد الشهيد أحمد عبدالله المصري إلى إدارة منتدى إسطنها وذلك لعمل مسابقة للإجابة على السؤال ويتم إبلاغ هيئة المحكمة بالنتيجة على أن تعقد المحكمة صباح يوم 24 يناير 2008 لمناقشة نتيجة المسابقة مع مراعاة حضور السيد الشهيد .. رفعت الجلسة ) ( تمت بحمدالله مؤقتا )

أبو الفداء 21/01/08, 03:36 pm

هنا ؟؟!!

في المنتدى؟؟

فكرة جامدة بجد...

شكرا أحمد...

بس هنجيب الأستاذ رفعت منين scratch

على العموم ..نحن في انتظار يوم 24/1/2008...

بفارغ الصبر...

واحد بيحب مصر 22/01/08, 11:56 pm

يا سادة

باقي يومين ومحدش جاوب على السؤال

أعمل إيه ؟ أقول إيه لهيئة المحكمة ؟

أرجو المساعدة

أبو الفداء

أ / أشرف عبد الجليل

أ / محمد عزت رضوان

أ / أحمد عبد الهادي

أ / محمود عبد الوارث القاضي

أ / محمد عماد بيومي

أ / عبدالرحمن ذكي

أ / رضا عبد الجليل

أ / marmar

أ / جويرية

أ / محمد أجمل الصياد

أرجو المساعدة

أبو الفداء 25/01/08, 12:08 pm

يبدو أنني قد أسأت الفهم...

لقد كنت بانتظار التكملة...

ولم أدرك أننا المعنيون بالسؤال...!!!

لذا أطالب بتأجيل القضية للإطلاع

ولكم جزيل الشكر

المحاكمة ( قصة طويلة في حلقات )

المحاكمة ( قصة طويلة في حلقات )

رد: المحاكمة ( قصة طويلة في حلقات )

كلام كبير اقوي

رد: المحاكمة ( قصة طويلة في حلقات )

رد: المحاكمة ( قصة طويلة في حلقات )

رد: المحاكمة ( قصة طويلة في حلقات )

رد: المحاكمة ( قصة طويلة في حلقات )

رد: المحاكمة ( قصة طويلة في حلقات )

رد: المحاكمة ( قصة طويلة في حلقات )

رد: المحاكمة ( قصة طويلة في حلقات )

رد: المحاكمة ( قصة طويلة في حلقات )

رد: المحاكمة ( قصة طويلة في حلقات )

رد: المحاكمة ( قصة طويلة في حلقات )

رد: المحاكمة ( قصة طويلة في حلقات )

رد: المحاكمة ( قصة طويلة في حلقات )

رد: المحاكمة ( قصة طويلة في حلقات )

رد: المحاكمة ( قصة طويلة في حلقات )

رد: المحاكمة ( قصة طويلة في حلقات )

رد: المحاكمة ( قصة طويلة في حلقات )

رد: المحاكمة ( قصة طويلة في حلقات )

رد: المحاكمة ( قصة طويلة في حلقات )

رد: المحاكمة ( قصة طويلة في حلقات )

رد: المحاكمة ( قصة طويلة في حلقات )

رد: المحاكمة ( قصة طويلة في حلقات )